ភ្នំពេញ៖ ម្ចាស់ដីឡូត៍ពិភពដីមាស និងអង្គរក្សសរុបចំនួន ១៣នាក់ ត្រូវបានអាជ្ញាធរកសាងសំណុំរឿងបញ្ជូនទៅតុលាការនារសៀលម៉ោង២ថ្ងៃទី០៨ ខែសីហា ឆ្នាំ២០២៣។ នេះបើតាមអ្នកនាំពាក្យស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា ដែលបញ្ជាក់ប្រាប់មកកាន់សារព័ត៌មាន EAC។

លោកវរសេនីយ៍ឯក សាន សុខសីហា បានប្រាប់ដូច្នេះថា៖ «នៅរសៀលនេះម៉ោង២សមត្ថកិច្ចនៃស្នងការដ្ឋាននគរបាលរាជធានីភ្នំពេញ រៀបចំសំណុំរឿងបញ្ជូនម្ចាស់ដីឡូត៍ពិភពដីមាស និងអង្គរក្សសរុបចំនួន ១៣នាក់បញ្ជូនទៅសាលាដំបូងរាជធានីភ្នំពេញដើម្បីអនុវត្តបន្តតាមនីតិវិធីច្បាប់»។

អ្នកនាំពាក្យស្នងការបានបញ្ជាក់ថា ការបញ្ជូនជនសង្ស័យទាំង ១៣នាក់នោះទៅតុលាការគឺពាក់ព័ន្ធនឹងបទល្មើសមួយចំនួន គឺអំពើឆបោកមានស្ថានភាពទម្ងន់ទោស ពាក់ព័ន្ធនឹងការញុះញង់ឱ្យប្រព្រឹត្តអំពើប្រឆាំងអ្នករាជការសាធារណៈ និងការសម្អាតប្រាក់។ល។

ម្ចាស់ដីឡូត៍ពិភពដីមាស ដែលមហាជនស្គាល់ថាជាឧកញ៉ា ហ៊ី គឹមហុង កាលពីរសៀលថ្ងៃទី០៧ ខែសីហា ឆ្នាំ២០២៣ ត្រូវបានសមត្ថកិច្ចឃាត់ខ្លួនរួមទាំងអង្គរក្សចំនួន១២នាក់ក្រោយពីបង្កហិង្សាដាក់សមត្ថកិច្ចស្ថិតក្នុងភូមិត្រពាំងថ្លាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ។

ករណីឃាត់ខ្លួនម្ចាស់ដីឡូត៍ពិភពដីមាសដែលមានងារជាឧកញ៉ានេះ បង្កឱ្យមានការភ្ញាក់ផ្អើលជាខ្លាំងដល់ពលរដ្ឋ និងអ្នកសារព័ត៌មានចុះផ្សាយយ៉ាងព្រោងព្រោតថា មុនឈានដល់មានការចាប់ខ្លួននេះ មានអតិថិជនជាច្រើននាក់បានមកតវ៉ាកាលពីព្រឹកថ្ងៃទី០៧ ខែសីហា និងសុំជួបម្ចាស់ដីឡូត៍ពិភពដីមាស លុះដល់ថ្ងៃរសៀលអតិថិជនបានសុំចូលស្នាក់ការប៉ុន្តែស្រាប់តែអង្គរក្សរបស់លោកឧកញ៉ាពិភពដីមាសគំរាមដកកាំភ្លើងខ្លី។ សមត្ថកិច្ចឃើញដូច្នេះក៏សម្រេចចិត្តបាញ់ឡើងលើជាច្រើនគ្រាប់ និងបានបង្កហិង្សាដាក់លើសមត្ថកិច្ច។

ឧកញ៉ា ហ៊ី គឹមហុង ត្រូវបានស្នងការដ្ឋាននគរបាលខេត្តកំពតកោះហៅមកកាន់ស្នងការដ្ឋាននគរបាលខេត្តកំពតនៅថ្ងៃទី២៦ ខែមិថុនា ឆ្នាំ២០២៣ តាមពាក្យបណ្តឹងរបស់ពលរដ្ឋក្នុងខេត្តកំពតពីបទឆបោកមានស្ថានទម្ងន់ទោស៕